2Sa 16 | CopSahBible2 | STEP | ⲇ︤ⲁ︦ⲇ︥ ⲇⲉ ⲁϥⲡⲁⲣⲁⲅⲉ ϩⲛ ⲧⲉϩⲓⲏ ⲛⲟⲩⲕⲟⲩⲓ ⲛϩⲣⲟⲱⲥ ⲧⲡⲟⲗⲓⲥ ⲁⲩⲱ ⲉⲓⲥ ⲥⲓⲃⲁ ⲡϩⲙϩⲁⲗ ⲙⲙⲉⲙⲫⲓⲃⲟⲥⲑⲉ ⲁϥⲓ ⲉⲃⲟⲗ ϩⲏⲧϥ ⲉⲣⲉⲟⲩⲥⲟⲉⲓϣ ⲛⲓⲱ ϩⲏⲕ ⲉⲣⲉϣⲏⲧ ⲛⲟⲉⲓⲕ ϩⲓϫⲱⲟⲩ ⲁⲩⲱ ϣⲉ ⲛϣⲓ ⲛⲉⲗⲉⲗϣⲟⲩϣⲟⲩ ⲁⲩⲱ ϣⲉ ⲛϣⲓ ⲛⲃⲏⲛⲛⲉ ⲁⲩⲱ ⲟⲩϣⲓ ⲛⲏⲣⲡ

2 Samuel 16

1 ⲇ︤ⲁ︦ⲇ︥ ⲇⲉ ⲁϥⲡⲁⲣⲁⲅⲉ ϩⲛ ⲧⲉϩⲓⲏ ⲛⲟⲩⲕⲟⲩⲓ ⲛϩⲣⲟⲱⲥ ⲧⲡⲟⲗⲓⲥ ⲁⲩⲱ ⲉⲓⲥ ⲥⲓⲃⲁ ⲡϩⲙϩⲁⲗ ⲙⲙⲉⲙⲫⲓⲃⲟⲥⲑⲉ ⲁϥⲓ ⲉⲃⲟⲗ ϩⲏⲧϥ ⲉⲣⲉⲟⲩⲥⲟⲉⲓϣ ⲛⲓⲱ ϩⲏⲕ ⲉⲣⲉϣⲏⲧ ⲛⲟⲉⲓⲕ ϩⲓϫⲱⲟⲩ ⲁⲩⲱ ϣⲉ ⲛϣⲓ ⲛⲉⲗⲉⲗϣⲟⲩϣⲟⲩ ⲁⲩⲱ ϣⲉ ⲛϣⲓ ⲛⲃⲏⲛⲛⲉ ⲁⲩⲱ ⲟⲩϣⲓ ⲛⲏⲣⲡ 2 ⲡⲉϫⲉⲡⲣⲣⲟ ⲉϩⲟⲩⲛ ϩⲛ ⲥⲓⲃⲁ ϫⲉ ⲟⲩ ⲛⲉ ⲛⲁⲓ ⲛⲧⲁⲕⲉⲛⲧⲟⲩ ⲡⲉϫⲉⲥⲓⲃⲁ ϩⲓⲑⲏ ⲙⲡⲣⲣⲟ ϫⲉ ⲛⲉⲓⲃⲁⲓⲛⲁϩⲃ ⲉⲧⲃⲉ ⲛⲁⲡⲏⲓ ⲙⲡⲣⲣⲟ ⲉⲧⲣⲉⲩϩⲙⲟⲟⲥ ϩⲓϫⲱⲟⲩ ⲁⲩⲱ ⲛⲉⲓⲟⲉⲓⲕ ⲙⲛ ⲛⲉⲓⲃⲏⲛⲛⲉ ⲉⲧⲣⲉⲛϣⲏⲣⲉ ϣⲏⲙ ⲟⲩⲟⲙⲟⲩ ⲁⲩⲱ ⲡⲉⲓⲏⲣⲡ ⲉⲧⲣⲉⲛⲉⲧϩⲟⲥⲉ ϩⲙ ⲡϫⲁⲓⲉ ⲥⲟⲟϥ 3 ⲡⲉϫⲉⲡⲣⲣⲟ ⲛⲁϥ ϫⲉ ⲉϥⲧⲱⲛ ⲡϣⲏⲣⲉ ⲙⲡⲉⲕϫⲟⲉⲓⲥ ⲡⲉϫⲉⲥⲓⲃⲁ ϩⲓⲑⲏ ⲙⲡⲣⲣⲟ ϫⲉ ⲉⲓⲥ ϩⲏⲏⲧⲉ ϥϩⲙⲟⲟⲥ ϩⲛ ⲑⲓ︤ⲗ︦ⲏ︦ⲙ︥ ϫⲉ ⲁϥϫⲟⲟⲥ ϫⲉ ⲙⲡⲟⲟⲩ ⲥⲉⲛⲁⲕⲧⲟ ⲉⲣⲟⲓ ⲛⲧⲙⲛⲧⲣⲣⲟ ⲙⲡⲁⲉⲓⲱⲧ ⲛϭⲓ ⲛⲁⲡⲏⲓ ⲙⲡⲓ︤ⲏ︦ⲗ︥ 4 ⲡⲣⲣⲟ ⲇⲉ ⲡⲉϫⲁϥ ⲛⲥⲓⲃⲁ ϫⲉ ⲉⲓⲥ ⲛⲉⲛⲕⲁ ⲧⲏⲣⲟⲩ ⲙⲙⲉⲙⲫⲓⲃⲟⲥⲑⲉ ⲉⲩⲉϣⲱⲡⲉ ⲛⲁⲕ ⲥⲓⲃⲁ ⲇⲉ ⲛⲧⲉⲣⲉϥⲟⲩⲱϣⲃ ϩⲓⲑⲏ ⲙⲡⲣⲣⲟ ⲡⲉϫⲁϥ ⲛⲁϥ ϫⲉ ⲉⲓⲉϭⲉⲛⲭⲁⲣⲓⲥ ⲛⲁϩⲣⲟⲕ ⲡⲁϫⲟⲉⲓⲥ ⲡⲣⲣⲟ 5 ⲇⲁⲩⲉⲓⲇ ⲇⲉ ⲁϥⲓ ⲉϩⲣⲁⲓ ⲉⲃⲁⲟⲩⲣⲓⲙ ⲉⲓⲥ ⲟⲩⲣⲱⲙⲉ ⲇⲉ ⲁϥⲉⲓ ⲉⲃⲟⲗ ϩⲙ ⲡⲙⲁ ⲉⲧⲙⲙⲁⲩ ⲉⲟⲩⲉ ⲉⲃⲟⲗ ⲡⲉ ϩⲙ ⲡⲏⲓ ⲛⲧⲥⲩⲅⲅⲉⲛⲓⲁ ⲛⲥⲁⲟⲩⲗ ⲉⲡⲉϥⲣⲁⲛ ⲡⲉ ⲥⲉⲙⲏⲉⲓ ⲡϣⲏⲣⲉ ⲛⲅⲏⲣⲁ ⲁϥⲧⲱⲟⲩⲛ ⲇⲉ ⲁϥⲓ ⲉⲃⲟⲗ ⲉϥⲥⲁϩⲟⲩ ⲛⲇ︤ⲁ︦ⲇ︥ 6 ⲁⲩⲱ ⲉϥⲛⲉϫⲱⲛⲉ ⲉⲣⲟϥ ϩⲛ ϩⲉⲛⲱⲛⲉ ⲁⲩⲱ ⲛϩⲙϩⲁⲗ ⲧⲏⲣⲟⲩ ⲙⲡⲣⲣⲟ ⲇ︤ⲁ︦ⲇ︥ ⲡⲗⲁⲟⲥ ⲇⲉ ⲧⲏⲣϥ ⲁⲩⲱ ⲛⲇⲩⲛⲁⲧⲟⲥ ⲧⲏⲣⲟⲩ ⲛⲉⲩⲙⲟⲟϣⲉ ⲛⲥⲁ ⲟⲩⲛⲁⲙ ⲁⲩⲱ ⲛⲥⲁ ϩⲃⲟⲩⲣ ⲙⲡⲣⲣⲟ 7 ⲥⲏⲙⲉⲉⲓ ⲇⲉ ⲉϥⲥⲁϩⲟⲩ ⲙⲡⲣⲣⲟ ⲛⲉϥϫⲱ ⲙⲙⲟⲥ ϩⲓⲛⲁⲓ ϫⲉ ⲙⲟⲟϣⲉ ⲉⲃⲟⲗ ⲡⲣⲱⲙⲉ ⲛⲥⲛⲱⲱϥ ⲁⲩⲱ ⲙⲡⲁⲣⲁⲛⲟⲙⲟⲥ 8 ⲁⲡϫⲟⲉⲓⲥ ⲕⲧⲟ ⲉϩⲣⲁⲓ ⲉϫⲱⲕ ⲛⲛⲉⲥⲛⲱⲱϥ ⲧⲏⲣⲟⲩ ⲙⲡⲏⲓ ⲛⲥⲁⲟⲩⲗ ⲉⲃⲟⲗ ϫⲉ ⲁⲕⲣⲣⲣⲟ ⲉⲡⲉϥⲙⲁ ⲁⲩⲱ ⲡϫⲟⲉⲓⲥ ⲁϥϯ ⲉϩⲣⲁⲓ ⲉⲧⲟⲟⲧϥ ⲛⲁⲃⲉⲥⲥⲁⲗⲱⲙ ⲡⲉⲕϣⲏⲣⲉ ⲛⲧⲙⲛⲧⲣⲣⲟ ⲁⲩⲱ ⲉⲓⲥ ϩⲏⲏⲧⲉ ⲛⲧⲟⲕ ⲕϩⲛⲧⲉⲕⲕⲁⲕⲓⲁ ϫⲉ ⲛⲧⲉⲕ ⲟⲩⲣⲱⲙⲉ ⲛⲧⲟⲕ ⲛⲥⲛⲟϥ 9 ⲁⲩⲱ ⲁⲃⲉⲥⲥⲁ ⲡϣⲏⲣⲉ ⲛⲥⲁⲣⲟⲩⲉⲓⲁ ⲡⲉϫⲁϥ ⲉϩⲟⲩⲛ ϩⲙ ⲡⲣⲣⲟ ϫⲉ ⲟⲩ ⲡⲉ ⲡⲉⲓⲟⲩϩⲟⲣ ⲉⲧⲙⲟⲟⲩⲧ ϫⲉ ⲉϥⲉⲥⲁϩⲟⲩ ⲙⲡⲁϫⲟⲉⲓⲥ ⲡⲣⲣⲟ ϯⲛⲁⲃⲱⲕ ⲉⲣⲟϥ ⲛⲧⲁϥⲓ ⲛⲧⲉϥⲁⲡⲉ 10 ⲡⲉϫⲉⲡⲣⲣⲟ ⲛⲁϥ ϫⲉ ⲁϩⲣⲱⲧⲛ ⲛⲙⲙⲁⲓ ⲛⲉϣⲏⲣⲉ ⲛⲥⲁⲣⲟⲩⲉⲓⲁ ⲁⲗⲱⲧⲛ ϩⲁⲣⲟϥ ⲉⲧⲣⲉϥⲥⲁϩⲟⲩ ϩⲓⲛⲁⲓ ϫⲉ ⲡϫⲟⲉⲓⲥ ⲡⲉ ⲛⲧⲁϥϫⲟⲟⲥ ⲛⲁϥ ⲉⲧⲣⲉϥⲥⲁϩⲟⲩ ⲛⲇⲁⲩⲉⲓⲇ ⲁⲩⲱ ⲛⲓⲙ ⲡⲉⲧⲛⲁϣϫⲟⲟⲥ ⲛⲁϥ ϫⲉ ⲉⲧⲃⲉ ⲟⲩ ⲁⲕⲉⲓⲣⲉ ⲛⲁⲓ 11 ⲁⲩⲱ ⲡⲉϫⲉⲇ︤ⲁ︦ⲇ︥ ⲉϩⲟⲩⲛ ϩⲛ ⲁⲃⲓⲥⲁ ⲁⲩⲱ ⲉϩⲟⲩⲛ ⲉⲛⲉϥϩⲙϩⲁⲗ ⲧⲏⲣⲟⲩ ⲉϥϫⲱ ⲙⲙⲟⲥ ⲛⲁⲩ ϫⲉ ⲉⲓⲥ ⲡⲁϣⲏⲣⲉ ⲣⲱ ⲁⲩⲱ ⲡⲉⲛⲧⲁϥⲉⲓ ⲉⲃⲟⲗ ϩⲛ ⲛⲁⲙⲉⲗⲟⲥ ⲁⲩⲱ ϥⲕⲱⲧⲉ ⲛⲥⲁ ⲧⲁⲯⲩⲭⲏ ⲉϥⲓⲧⲥ ⲉϫⲙ ⲡⲁⲓ ⲇⲉ ϩⲱⲱϥ ⲧⲉⲛⲟⲩ ⲡⲕⲉϣⲏⲣⲉ ⲛⲓⲉⲙⲓⲛⲓ ⲁⲗⲱⲧⲛ ϩⲁⲣⲟϥ ⲙⲁⲣⲉϥⲥⲁϩⲟⲩ ϫⲉ ⲡϫⲟⲉⲓⲥ ⲡⲉⲛⲧⲁϥϫⲟⲟⲥ ⲛⲁϥ ⲉⲧⲣⲉϥⲣⲡⲁⲓ 12 ⲙⲉϣⲁⲕ ⲛⲧⲉⲡϫⲟⲉⲓⲥ ϭⲱϣⲧ ⲉϫⲙ ⲡⲁⲑⲃⲃⲓⲟ ⲛϥⲕⲧⲟ ⲉϩⲣⲁⲓ ⲉϫⲱⲓ ⲛϩⲉⲛⲁⲅⲁⲑⲟⲛ ⲉⲡⲙⲁ ⲙⲡⲉϥⲥⲁϩⲟⲩ ϩⲙ ⲡⲟⲟⲩ ⲛϩⲟⲟⲩ 13 ⲁⲩⲱ ⲇ︤ⲁ︦ⲇ︥ ⲙⲛ ⲛⲣⲱⲙⲉ ⲉⲧⲛⲙⲙⲁϥ ⲁⲩⲙⲟⲟϣⲉ ϩⲛ ⲧⲉϩⲓⲏ ⲥⲉⲙⲉⲉⲓ ⲇⲉ ϩⲱⲱϥ ⲛⲉϥⲙⲟⲟϣⲉ ⲛⲥⲁⲥⲡⲓⲣ ⲙⲡⲧⲟⲟⲩ ⲉϥϩⲏⲛ ⲉⲣⲟϥ ⲛⲉϥⲙⲟⲟϣⲉ ⲇⲉ ⲉϥⲥⲁϩⲟⲩ ⲁⲩⲱ ⲉϥⲛⲉϫⲱⲛⲉ ϩⲛ ϩⲉⲛⲱⲛⲉ ⲛⲥⲁⲥⲡⲓⲣ ⲙⲙⲟϥ ⲁⲩⲱ ⲉϥⲛⲉϫⲉⲓⲧⲛ ⲉϩⲟⲩⲛ ϩⲙ ⲡⲉϥϩⲟ 14 ⲡⲣⲣⲟ ⲇⲉ ⲙⲛ ⲡⲗⲁⲟⲥ ⲧⲏⲣϥ ⲉⲧⲛⲙⲙⲁϥ ⲁⲩⲉⲓ ⲉⲩϩⲟⲥⲉ ⲁⲩⲱ ⲉⲩϣⲟⲥⲙ ⲁⲩϭⲱ ⲁⲩⲙⲧⲟⲛ ⲙⲙⲟⲟⲩ ⲙⲡⲙⲁ ⲉⲧⲙⲙⲁⲩ 15 ⲁⲃⲉⲥⲥⲁⲗⲱⲙ ⲇⲉ ⲙⲛ ⲛⲣⲱⲙⲉ ⲙⲡⲓ︤ⲏ︦ⲗ︥ ⲁⲩⲃⲱⲕ ⲛⲙⲙⲁϥ ⲉϩⲟⲩⲛ ⲉⲑⲓ︤ⲗ︦ⲏ︦ⲙ︥ ⲉⲣⲉⲁⲭⲓⲧⲟⲫⲉⲗ ⲛⲙⲙⲁϥ 16 ⲁⲥϣⲱⲡⲉ ⲇⲉ ⲛⲧⲉⲣⲉϥⲉⲓ ⲛϭⲓ ⲭⲟⲩⲥⲓ ⲡⲉϣⲃⲏⲣ ⲟⲛ ⲛⲇ︤ⲁ︦ⲇ︥ ⲉⲣⲁⲧϥ ⲛⲁⲃⲉⲥⲥⲁⲗⲱⲙ ⲡⲉϫⲉⲭⲟⲩⲥⲓ ⲛⲁⲃⲉⲥⲥⲁⲗⲱⲙ ϫⲉ ⲙⲁⲣⲉϥⲱⲛϩ ⲛϭⲓ ⲡⲣⲣⲟ 17 ⲡⲉϫⲉⲁⲃⲉⲥⲥⲁⲗⲱⲙ ⲉϩⲟⲩⲛ ϩⲛ ⲭⲟⲩⲥⲓ ϫⲉ ⲡⲁⲓ ⲡⲉ ⲡⲉⲕⲛⲁ ⲛⲧⲁⲕⲁⲁϥ ⲙⲛ ⲡⲉⲕϣⲃⲏⲣ ⲉⲧⲃⲉ ⲟⲩ ⲙⲡⲉⲕⲃⲱⲕ ⲙⲛ ⲡⲉⲕϣⲃⲏⲣ 18 ⲡⲉϫⲉⲭⲟⲩⲥⲓ ⲉϩⲟⲩⲛ ϩⲛ ⲁⲃⲉⲥⲥⲁⲗⲱⲙ ϫⲉ ⲛϯⲛⲁⲣⲡⲁⲓ ⲁⲛ ⲁⲗⲗⲁ ⲉⲓⲛⲁⲟⲩⲁϩⲧ ⲛⲧⲟϥ ⲛⲥⲁ ⲡⲉⲛⲧⲁⲡϫⲟⲉⲓⲥ ⲥⲟⲧⲡϥ ⲁⲩⲱ ⲡⲉⲛⲧⲁⲡⲉⲓⲗⲗⲁⲟⲥ ⲙⲛ ⲛⲣⲱⲙⲉ ⲧⲏⲣⲟⲩ ⲙⲡⲓ︤ⲏ︦ⲗ︥ ⲥⲟⲧⲡϥ ⲉⲓⲛⲁⲱⲡ ⲉⲣⲟϥ ⲁⲩⲱ ⲉⲓⲛⲁϭⲱ ϩⲁⲧⲏϥ 19 ⲙⲛⲛⲥⲁ ⲡⲁⲓ ⲇⲉ ⲁⲛⲟⲕ ⲉⲓⲛⲁⲣϩⲙϩⲁⲗ ⲛⲛⲓⲙ ⲉⲓⲛⲁⲉⲓⲣⲉ ⲁⲛ ϩⲓⲑⲏ ⲙⲡⲉϥϣⲏⲣⲉ ⲕⲁⲧⲁ ⲑⲉ ϭⲉ ⲛⲧⲁⲓⲣϩⲙϩⲁⲗ ⲛⲁϩⲣⲁϥ ⲙⲡⲉⲕⲉⲓⲱⲧ ⲧⲁⲓ ⲧⲉ ⲑⲉ ⲉϯⲛⲁⲉⲓⲣⲉ ϩⲱⲱϥ ⲛⲁϩⲣⲟⲕ 20 ⲡⲉϫⲉⲁⲃⲉⲥⲥⲁⲗⲱⲙ ⲛⲁⲭⲓⲇⲟⲫⲉⲗ ϫⲉ ⲛⲧⲱⲧⲛ ⲁⲛⲓⲟⲩⲅⲛⲱⲙⲏ ⲛⲁⲛ ⲉϩⲟⲩⲛ ϫⲉ ⲟⲩ ⲡⲉⲧⲛⲛⲁⲁⲁϥ 21 ⲡⲉϫⲉⲁⲭⲓⲇⲟⲫⲉⲗ ⲛⲁⲃⲉⲥⲥⲁⲗⲱⲙ ϫⲉ ⲃⲱⲕ ⲉϩⲟⲩⲛ ϣⲁ ⲙⲡⲁⲗⲗⲁⲕⲏ ⲙⲡⲉⲕⲉⲓⲱⲧ ⲛⲁⲓ ⲛⲧⲁϥⲕⲁⲁⲩ ⲉⲡⲁϩⲟⲩ ⲉⲧⲣⲉⲩϩⲁⲣⲉϩ ⲉⲡⲉϥⲏⲓ ⲁⲩⲱ ⲥⲉⲛⲁⲥⲱⲧⲙ ⲛϭⲓ ⲡⲓ︤ⲏ︦ⲗ︥ ⲧⲏⲣϥ ϫⲉ ⲁⲕϯϣⲓⲡⲉ ⲙⲡⲉⲕⲉⲓⲱⲧ ⲁⲩⲱ ⲥⲉⲛⲁⲧⲁϫⲣⲟ ⲛϭⲓ ⲛϭⲓϫ ⲛⲟⲩⲟⲛ ⲛⲓⲙ ⲉⲧⲛⲙⲙⲁⲕ 22 ⲁⲩⲱ ⲁⲩⲧⲁϩⲟ ⲉⲣⲁⲧⲥ ⲛⲧⲉⲥⲕⲏⲛⲏ ⲛⲁⲃⲉⲥⲥⲁⲗⲱⲙ ϩⲓ ⲧϫⲉⲛⲉⲡⲱⲣ ⲁⲁⲃⲉⲥⲥⲁⲗⲱⲙ ⲃⲱⲕ ⲉϩⲟⲩⲛ ϣⲁ ⲙⲡⲁⲗⲗⲁⲕⲏ ⲙⲡⲉϥⲉⲓⲱⲧ ⲙⲡⲙⲧⲟ ⲉⲃⲟⲗ ⲙⲡⲓ︤ⲏ︦ⲗ︥ ⲧⲏⲣϥ 23 ⲁⲩⲱ ⲡϣⲟϫⲛⲉ ⲛⲧⲁⲁⲭⲓⲧⲟⲫⲉⲗ ϣⲟϫⲛⲉ ⲙⲙⲟϥ ϩⲛ ⲛⲉϩⲟⲟⲩ ⲛϣⲟⲣⲡ ⲛⲑⲉ ⲛⲟⲩⲁ ⲉϥⲛⲁϣⲓⲛⲉ ϩⲙ ⲡϣⲁϫⲉ ⲙⲡⲛⲟⲩⲧⲉ ⲧⲁⲓ ⲧⲉ ⲑⲉ ⲙⲡϣⲟϫⲛⲉ ⲧⲏⲣϥ ⲛⲁⲭⲓⲇⲟⲫⲉⲗ ⲛⲁϩⲣⲁϥ ⲛⲇ︤ⲁ︦ⲇ︥ ⲁⲩⲱ ⲛⲁϩⲣⲁϥ ⲛⲁⲃⲉⲥⲥⲁⲗⲱⲙ